ក្រុមហ៊ុនអាតូមីបរិច្ចាគប្រាក់ចំនួន 3.3 ពាន់លានវ៉ុនដើម្បីបង្កើតមន្ទីរពេទ្យព្រះយេស៊ូ PMC-Atomy
អាជីវកម្មជាបេសកម្ម ដែលបន្តអនុវត្តរហូតដល់សេចក្តីស្រលាញ់របស់ព្រះបានមកដល់មនុស្សជាតិទាំងអស់
ក្រុមហ៊ុនអាតូមី និងមន្ទីរពេទ្យព្រះយេស៊ូនៅក្នុងក្រុងជនជូ កំពុងតែរួមដៃគ្នាដើម្បីសាងសង់មន្ទីរពេទ្យព្រះយេស៊ូ PMC-Atomy នៅក្នុងប្រទេសកម្ពុជា។ ក្រុមហ៊ុនអាតូមីបានប្រកាសថាពិធីប្រគល់ការបរិច្ចាគបានធ្វើឡើងនៅឯសិក្ខាសាលាអំពីភាពជោគជ័យនាថ្ងៃទី 14 ខែមេសា ដើម្បីប្រារព្ធដល់ការបរិច្ចាគទឹកប្រាក់ចំនួន 3.3 ពាន់លានវ៉ុនដល់មូលនិធិមន្ទីរពេទ្យយេស៊ូ ចនជូ។ នៅក្នុងសិក្ខាសាលាអំពីភាពជោគជ័យរបស់ក្រុមហ៊ុនអាតូមី លោកប្រធានរបស់ក្រុមហ៊ុនអាតូមី បាក់ ហាន់ហ្គីល និងប្រធានមន្ទីរពេទ្យយេស៊ូ ចនជូ លោក ស៊ីន ឆុង ស៊ីក ទទួលបានការចូលរួមពីសមាជិកជាង 20,000 នាក់ពីទូទាំងប្រទេសកូរ៉េ និងពីសាខានៅក្រៅប្រទេស ដើម្បីចូលរួមក្នុងពិធីប្រគល់ការបរិច្ចាគនេះ ទាំងដោយទៅជួបមុខផ្ទាល់ និងទាំងតាមអនឡាញ។ “មន្ទីរពេទ្យយេស៊ូ ចនជូ ត្រូវបានបង្កើតឡើងក្នុងឆ្នាំ 1898 ដោយអ្នកផ្សព្វផ្សាយសាសនាឈ្មោះ Mattie Ingold និងបានស្វាគមន៍អ្នករស់នៅក្នុងតំបន់ ហើយបានព្យាបាលអ្នកជំងឺដោយសេចក្ដីស្រលាញ់ពីព្រះយេស៊ូគ្រីស្ទអស់រយៈពេល 124 ឆ្នាំមកហើយ។ ឥឡូវនេះ ដោយសារមានការគាំទ្រយ៉ាងសកម្មពីក្រុមហ៊ុនអាតូមី សេចក្តីស្រលាញ់នេះអាចរីកសុសសាយដល់ប្រទេសកម្ពុជា” នេះបើតាមការពន្យល់របស់លោកប្រធាន ស៊ីន ឆុង ស៊ីក។
យោងតាមមន្ទីរពេទ្យយេស៊ូ ចនជូ មន្ទីរពេទ្យនានាក្នុងប្រទេសកម្ពុជាទទួលរងពីការខ្វះខាតសមត្ថភាព ដោយសារអត្រាគ្រែអ្នកជំងឺបច្ចុប្បន្ននេះមានអ្នកជំងឺលើសពីកម្រិត 100%។ នៅក្នុងឆ្នាំ 2016 មានគ្រែមន្ទីរពេទ្យចំនួន 10,870 គ្រែ ដែលស្មើនឹងសមាមាត្រត្រឹម 0.84 គ្រែក្នុងមនុស្ស 1,000 នាក់។ មានភាពខ្វះខាតនៅក្នុងមន្ទីរពេទ្យរដ្ឋ ដែលផ្តល់សេវាកម្មវេជ្ជសាស្ត្រទំនើបដល់សាធារណជនទូទៅ។
មន្ទីរពេទ្យព្រះយេស៊ូ PMC-Atomy មានគោលបំណងផ្តល់ជូនការថែទាំផ្នែកវេជ្ជសាស្ត្រឱ្យបានល្អបំផុត ដោយប្រើប្រាស់ការបម្រើពីបុគ្គលិកថែទាំសុខភាពគ្រីស្តសាសនា និងអ្នកដឹកនាំជំនាន់ក្រោយ ហើយបន្តដំណើរការបេសកកម្មនេះ។ ការបរិច្ចាគជាចម្បងនេះពីក្រុមហ៊ុនអាតូមី នឹងត្រូវបានប្រើដើម្បីផ្គត់ផ្គង់ដល់មន្ទីរពេទ្យព្រះយេស៊ូក្នុងប្រទេសកម្ពុជា ជាមួយនឹងសម្ភារៈ និងប្រព័ន្ធវេជ្ជសាស្ត្រជឿនលឿន។ វាក៏នឹងត្រូវបានប្រើដើម្បីបណ្តុះបណ្តាលបុគ្គលិកវេជ្ជសាស្ត្រ ផ្តល់បរិយាកាសថែទាំសុខភាពប្រកបដោយការអនុគ្រោះ និងគាំទ្រដល់ជនខ្វះខាតជាមួយនឹងថ្លៃចំណាយវេជ្ជសាស្ត្ររបស់ពួកគេ ដោយការផ្តល់ជូនការពិនិត្យសុខភាព និងការថែទាំភ្នែកឥតគិតថ្លៃ។ តំណាងរបស់ PMC មួយរូបដែលមានក្ដីរំភើបក្នុងចិត្តជាខ្លាំងបានមានប្រសាសន៍ថា៖ “រួមគ្នា ក្រុមហ៊ុនអាតូមី និង PMC កំពុងតែធ្វើឱ្យក្ដីសុបិនដែលមនុស្សណាម្នាក់មានពី 124 ឆ្នាំឱ្យក្លាយជាការពិត។
ក្នុងខែមីនា ក្រុមហ៊ុនអាតូមីក៏បានបរិច្ចាគទឹកប្រាក់ចំនួន 2.1 ពាន់លានវ៉ុនដល់អង្គការសហប្រតិបត្តិការវេជ្ជសាស្រ្តអន្តរជាតិ ដែលហៅកាត់ជាភាសាអង់គ្លេសថា (PMCI) ជាអង្គការក្រៅរដ្ឋាភិបាលមួយ ដែលនៅក្នុងអង្គការនោះគ្រូពេទ្យរបស់មន្ទីរពេទ្យយេស៊ូ ចនជូ មានតួនាទីជាស្នូល។ PMCI ត្រូវបានបង្កើតឡើងនៅក្នុងឆ្នាំ 2005 ហើយជាអង្គការក្រៅរដ្ឋាភិបាលមិនរកកម្រៃមួយ ដែលមានគោលបំណងនាំយកនូវវឌ្ឍនភាពទៅដល់តំបន់នានាដែលមានភាពខ្វះខាត តាមរយៈការស្ម័គ្រចិត្តបម្រើសេវាផ្នែកវេជ្ជសាស្ត្ររបស់ខ្លួន។ គម្រោងនាពេលបច្ចុប្បន្ននេះរួមមាន ▲ការអភិវឌ្ឍធនធានមនុស្ស ▲ការផ្លាស់ប្ដូរបទពិសោធន៍សង្គម វប្បធម៌ និងការអប់រំអន្តរជាតិ និង ▲ការផ្លាស់ប្ដូរបទពិសោធន៍ជាលក្ខណៈអន្តរជាតិនៅក្នុងវិស័យបរិស្ថាននិងសុខភាព។ វិស័យជាគោលដ៏ពិសេសមួយសម្រាប់អង្គការនេះគឺការអភិវឌ្ឍសមត្ថភាពធនធានមនុស្ស តាមរយៈការបណ្ដុះបណ្ដាលនិងការបញ្ជូនបុគ្គលិកជំនាញទៅកាន់ប្រទេសដែលមិនទាន់អភិវឌ្ឍសេវាថែទាំសុខភាពពេញលេញនៅឡើយ បន្ថែមពីលើការផ្តល់ជូនជំនួយសម្រាប់ពលករបរទេសនៅក្នុងប្រទេសកូរ៉េ។ ចាប់តាំងពីចុះហត្ថលេខានៅលើអនុស្សរណៈយោគយល់ដើម្បីកិច្ចសហប្រតិបត្តិការរួមគ្នាជាមួយនឹង PMCI ក្នុងឆ្នាំ 2020 មក ក្រុមហ៊ុនអាតូមីបានធ្វើការយ៉ាងជិតស្និទ្ធជាមួយ PMCI តាមរយៈការបិរច្ចាគរថយន្តក្រុងព្យាបាលចល័តក្នុងប្រទេសកម្ពុជា ក្នុងចំណោមសកម្មភាពផ្សេងៗ។
ដោយគ្រោងថានឹងបើកនៅក្នុងខែតុលានេះ មន្ទីរពេទ្យព្រះយេស៊ូ PMC-Atomy នឹងធ្វើការជាមួយនឹង PMCI ដើម្បីបង្កើតឱ្យមានប្រព័ន្ធថែទាំសុខភាពប្រកបដោយប្រសិទ្ធភាពជាងមុន តាមរយៈការប្រមូលយកទិន្នន័យវេជ្ជសាស្ត្រទ្រង់ទ្រាយធំនៅទូទាំងប្រទេសកម្ពុជា និងការអភិវឌ្ឍប្រព័ន្ធសហប្រតិបត្តិការជាមួយនឹងមណ្ឌលផ្នែកវេជ្ជសាស្ត្រដទៃទៀត។ លើសពីនេះទៅទៀត ក្រុមហ៊ុនអាតូមីសង្ឃឹមថានឹងផ្ដល់ជូននូវការគាំទ្រយ៉ាងទូលំទូលាយទៅដល់បេសកកម្មផ្នែកវេជ្ជសាស្ត្រតាមរយៈការបំប្លែងក្រុមព្យាបាលចល័តរបស់ PMCI ឲ្យទៅជាបុគ្គលិកមន្ទីរពេទ្យតាមរយៈការបណ្ដុះបណ្ដាល និងការអភិវឌ្ឍបណ្ដាញជាមួយនឹងមជ្ឈមណ្ឌលសុខភាពនៅក្នុងតំបន់។
ក្រុមហ៊ុនអាតូមីគឺជាក្រុមហ៊ុនចែកចាយសកលដែលកំពុងមានការរីកចម្រើន ដោយមានយុទ្ធសាស្ត្រគ្រប់គ្រងផ្អែកទៅលើផ្នត់គំនិតរបស់គ្រឹស្តសាសនា និងបាវចនា “គោរពលើគោលការណ៍នៃមនុស្សធម៌”។ ក្រុមហ៊ុនចុះផ្សព្វផ្សាយទៅកាន់អតិថិជនធម្មតាក្នុងនាមជា “ក្រុមហ៊ុនអាតូមីដែលអ្នអាចជឿទុកចិត្ត” ដោយមានទស្សនៈ “គុណភាពល្អផ្តាច់ និង តម្លៃល្អផ្តាច់” ហើយតាមរបៀបនេះ ក្រុមហ៊ុនអនុវត្ត ទីផ្សារបណ្តាញ ដើម្បីសម្រេចបានជោគជ័យសម្រាប់សមាជិករបស់ខ្លួន។ បច្ចុប្បន្ននេះ ក្រុមហ៊ុនអាតូមីមានប្រតិបត្តិការនៅក្នុងតំបន់ចំនួន 26 នៅទូទាំងពិភពលោកហើយនៅក្នុងឆ្នាំ 2021 ការលក់ជាសកលមានទឹកប្រាក់ចំនួន 2.2 ទ្រីលានវ៉ុន។
ក្នុងឆ្នាំ 2020 ក្រុមហ៊ុនអាតូមី និង មន្ទីរពេទ្យយេស៊ូ ចនជូ បានចុះហត្ថលេខានៅលើអនុស្សរណៈយោគយល់គ្នាមួយដើម្បីធ្វើការបណ្ដុះបណ្ដាលនិងស្រាវជ្រាវអំពីការថែទាំសុខភាព ក៏ដូចជាការផ្លាស់ប្ដូរធនធានមនុស្ស សម្ភារៈ និងការសិក្សា។ ចាប់តាំងពីពេលនោះមក ក្រុមហ៊ុនបានធ្វើការជាមួយនឹងបេសកកម្មផ្នែកវេជ្ជសាស្ត្រនៅក្នុងគំនិតផ្តួចផ្ដើមផ្សេងៗ ដែលរួមបញ្ចូលទាំងការចែកចាយមូលនិធិទៅកាន់ការបង្កើតមជ្ឈមណ្ឌលស្ដារនីតិសម្បទាកុមារសាធារណៈ។
“យើងមានក្តីរំភើបរីករាយក្នុងការមានសមត្ថភាពគាំទ្រដល់កិច្ចការដ៏ប្រពៃរបស់អ្នកផ្សព្វផ្សាយសាសនា Mattie Ingold ទៅដល់ប្រទេសកម្ពុជា។ ក្រុមហ៊ុនអាតូមីនឹងបន្តក្រមសីលធម៌នៃ អាជីវកម្មជាបេសកម្ម រហូតដល់សេចក្តីស្រឡាញ់របស់ព្រះផ្សព្វផ្សាយទៅដល់មនុស្សលោកទាំងអស់” នេះបើតាមសម្ដីរបស់ប្រធានក្រុមហ៊ុនអាតូមី បាក់ ហាន់ហ្គីល។
ខាងឆ្វេង) ប្រធានក្រុមហ៊ុនអាតូមី បាក់ ហាន់ហ្គីល ខាងស្តាំ) ប្រធានមន្ទីរពេទ្យយេស៊ូ ចនជូ លោក ស៊ីន ឆុង ស៊ីក